Psa 89 | YomNWM | STEP | Nkunga Etani muisi Ezilakite. Ndiela yimbidila mamboti manneni ma Yave mu zithangu zioso. Mu munu ama ndiela zabikisila kikuikizi kiaku muidi zitsungi zioso.

Psalms 89

Kuevi kuidi mamboti makhulu e ?

Nkunga Etani muisi Ezilakite.

1 Ndiela yimbidila mamboti manneni ma Yave
mu zithangu zioso.
Mu munu ama ndiela zabikisila kikuikizi kiaku
muidi zitsungi zioso.
2 Ndiela samuna ti luzolo luaku luidi lutelama dio ngui mu zithangu zioso.
Ti ngeyo wutula kikhuikizi kiaku mu diyilu.
3 Ngeyo wutuba :
“nditula Nguizani ama ayi mutu ama wowo ndivinda mafuta ;
Ndidia ndefi kuidi Davidi, kisadi kiama :
4 Ndiela bieka nkunꞌaku mu zithangu zioso ;
ayi ndiela kitula kundu kiaku ki kipfumu kikinda mu zitsungi zioso.”
5 Diyilu dinzitisa matsiminanga maku, a Yave
kikhuikizi kiaku mu lukutukunu lu banlongo.
6 Bila nani mu matuti wulenda dedokoso banga Yave ?
Widi banga Yave mu bivangu bi diyilu e ?
7 Mu lukutukunu lu banlongo, Nzambi wulembo kinzuku ngolo
tsisi kadi yiviokidi batu bobo banzungididi.
8 A Yave, Nzambi nkua ngolo yoso, nani widi banga ngeyo e ?
Widi nkua ngolo, a Yave,
ayi kikhuikizi kiaku kizungididi.
9 Ngeyo weti yadila mbu wufuemini,
Mayo mandi mawu telama ngeyo weti lembika mawu.
10 Ngeyo wukosikisa Lahabi banga mutu wuvondo
mu koko kuawu ku lulendo ngeyo wusasikisa bambeni ziaku.
11 Ngeyo vuidi diyilu ayi ntoto diaka ngeyo vuidi wawu.
Ngeyo wuvanga nza ayi bibio bidi muawu.
12 Ngeyo wuvanga Nodi ayi Sude ;
Taboli ayi Helimoni
bieti yimbila mu khini mu diambu di dizina diaku.
13 Koko kuaku kufulukidi mu lulendo ;
koko kuaku ngolo kuidi
koko kuaku ku lubakala kuyayusu ngolo.
14 Busonga ayi bufuana biawu fundasio
yi kundu kiaku ki kipfumu.
Luzolo ayi kikhuikizi bindiata ku ntuala.
15 Lusakumunu kuidi batu bobo banlonguka kubudila zitsiaki ;
bobo bandiatilanga mu kiezila ki meso maku, a Yave.
16 Beti mona khini mu dizina diaku mu lumbu kimvimba
beti yangalala mu busonga buaku.
17 Bila ngeyo nkembo awu ayi zingolo ziawu
ayi mu nlemvo aku, ngeyo wuyayisa phokꞌeto.
18 Bukiedika, nkaku eto wuviulu kuidi Yave
ntinu eto kuidi mutu wunlongo wu Iseli.
19 Khumbu yimosi ngeyo wuyolukila mu tsongolo
kuidi batu baku bakuikama ngeyo wutuba :
“Ndivana zingolo kuidi mutu wu ngolo.
Ndiyayisa muana ditoko va khatitsika batu.
20 Ndibakula Davidi kisadi kiama,
mu mafuta mama manlongo, minu ndimvindila.
21 Koko kuama kuela kunsimba ;
bukiedika koko kuama kuela kumvana zingolo.
22 Kadi mbeni yimosi yilendi kutula ku tsi minsua miandi ko.
Mu diambu di futa phaku.
Kadi mutu wumosi wumbimbi kalendi kunyamisa ko.
23 Ndiela kosikisa va meso mandi batu bobo beti kunlenda
ayi ndiela buisa bobo beti kunlenda.
24 Luzolo luama lukuikama luela ba yandi
mpe mu dizina diama phoka ziandi ziela tombolo.
25 Ndiela tula koko kuandi va mbata mbu
ayi koko kuandi ku lubakala va mbata minlangu.
26 Niandi wela kuthela :
‘Ngeyo widi dise diama, Nzambi ama
ditadi dingolo Mvulusi ama.’
27 Ndiela kunsobula diaka muanꞌama wutheti
wowo lutidi zangama
mu mintinu mioso midi va ntoto.
28 Ndiela simbidila luzolo luama va niandi
mu zithangu ziozo
ayi Nguizani ama va niandi yilendi ba babeba ko.
29 Ndiela telimisa dio ngui nkunꞌandi mu zithangu zioso
kundu kiandi ki kipfumu kiela zingila
banga bilumbu bi diyilu.
30 Enati bana bandi balozidi Mina miama
ayi enati bakadi landakana zinzengolo ziama ;
31 enati babundudi zinzengolo ziama
enati bakadi keba zithumunu ziama,
32 ndiela tumbudila masumu mawu mu lusuadi,
mambimbi mawu mu bikoti ;
33 vayi ndilendi ba botula ko luzolo luama mu niandi
ayi ndilendi tunuka kikhuikizi kiama ko.
34 Ndilendi ba bundula Nguizani ama ko
voti ndilendi balula ko
mambu momo bididi biama matotula.
35 Mu khumbu yimosi,
ndidia ndefi mu bunlongo buama
ayi ndilendi ba vuna Davidi ko.
36 Buna nkunꞌandi wela zingilanga mu zithangu zioso
ayi kundu kiandi ki kipfumu kiela zingila va ntualꞌama
banga thangu.
37 Kiela ba kitelama dio ngui mu zithangu zioso
banga ngondi,
mbangi yikuikama mu matuti.”
38 Vayi ngeyo wunloza, wunlenza ;
wuba wufuema beni kuidi mutu aku wudukudila mafuta.
39 Ngeyo wuvonda Nguizani ayi kisadi kiaku ;
ayi ngeyo wubundula budu ki kipfumu kiandi
nate wuloza kiawu va difundu-fundu.
40 Ngeyo wumana tiolumuna bibaka biandi bioso
ayi wutula bisuamunu biandi bingolo mu mbivusu.
41 Babo baviokila vana, banziona bima ;
wuyika diambu di mvuezolo kuidi bafikimini yandi.
42 Ngeyo wuzangula koko ku lubakala
ku bobo bakunlendanga,
wumonisa bambeni bandi zioso khini.
43 Ngeyo wuvengumuna meno ma sabala kiandi
ayi wusia kunsadisa ko mu mvita.
44 Ngeyo wumanisa kiezila kiandi
ayi wuloza kundu kiandi ki kipfumu va tsi.
45 Ngeyo wukufisa bilumbu bi bumuana buandi ;
wumfuka yunga ki tsoni.
46 Nate thangu mbi a Yave wela suamina e ?
Nate thangu mbi miangu miaku miela
lemina banga mbazu e ?
47 Tebuka moyo boso luzingu luama luididi lukhufi.
A buevi, buna mu phamba kuandi wuvangila batu boso e ?
48 Mutu mbi wowo lenda zinga ayi wela kambu mona lufua e ?
Voti kukivukisa
mu lulendo lu tsi yi bafua e ?
49 A Yave, kuevi kuidi luzolo luaku lunene lukhulu,
mu lolo wuzengila ndefi mu kikhuikizi kiaku
mu diambu di Davidi e ?
50 Tebukila moyo a Pfumu, buevi kisadi kiaku bakisekinina ;
buevi ndilembo natina mu ntimꞌama bifingu bi makanda moso.
51 Bifingu biobi bambeni ziaku basekinina,
biobi basekinina kadika thama yi mutu aku
wowo wudukudila mafuta.
52 Nzitusu kuidi Yave mu zithangu zioso.

Amen, ayi Amen.